Dear Alarm Clock,

"Hoy Alarm,

Bakit di mo ako ginising kanina?! Kainis ka naman eh, alam mo ng ayaw nya ng nalelate! May lakad kami ngayon! Bihira lang ito, tapos ganito nanaman?! Huwag mong sabihing ginising mo ako at pinatahimik lang kita! Dahil sayo nagalit sya sakin! Dahil sayo nag-away kami! Kesyo hindi ako dumating sa usapan, kesyo pinaghintay ko sya! Nakakainis ka kasi dapat kinulit mo ako! Bwisit ka! Sa uuliting hindi mo ako magigising ng maaga, itatapon kita!"

Nagulat ako, biglang nagkaroon ng mata at bibig ang orasan ko, unti unti pang tumubo ang mga pangil nito at tinitigan ako ng masama. Sumagot si kumpareng Alarm Clock. "Hoy batugan! Dada ka ng dada dyan, talsik mo lumalaway! At huwag mo nga akong maduro duro dyan at baka tusukin ko yang dalawa mong mata gamit ang dalawang kamay ko! Huwag mo akong sisihin dahil hindi ka nagising agad at hindi ka nakarating sa oras ng pagkikita nyo! Alam mo bang, nagkakanda paos paos na ako kakagawa ng ingay na gigising sayo! Tapos sisigawan mo pa ako, 'hoy tumigil ka nga!' Naguguluhan na ako sayo tapos paggising mo, sisisihin mo ako dahil di ka nagising agad?! Eh kung bawat magpagising ka sakin, kunin ko isa isa ang laman ng wallet mo hangga't hindi ka nagigising hanggang sa maubos? O kaya, bunutin ko ang buhok sa ilong mo ng sabay-sabay para matuto ka! Batukan kita dyan eh! Ayusin mo buhay mo."

Gulat na gulat ako sa pangyayari. Nagsasalita ang alarm clock ko? Nagising ako nang may mambatok sakin.

"Panjo, gising na. Malelate ka sa trabaho." wika ni mama.

"Ma naman. Ba't kailangan nyo pa akong batukan?" papungay pungay pa akong umupo sa higaan ko kinakamot ang ulo at singit ko.

"Kanina ka pa binubulabog ng maingay mong alarm clock eh. Pati ako nabulasyaw. Hala. Tara na't nakahain na."

"Opo." bigla akong natauhan sa aking panaginip. "Kanina mo pa pala ako ginigising. Pasensya na, napasarap ang tulog ko." wika ko habang kinakapa ang switch off ng alarm.

"Alam mo, mula pa noong bata ako ikaw na ang ginagamit kong panggising. Madalas akong malate kahit na ginigising mo ako. Naiinis pa ako sayo kasi hindi ako nagigising sa ingay mo. Ngayon ko lang napag-isip-isip na hindi ikaw ang may kasalanan. Ako. It's not you, it's me. Salamat sa pagttyaga mo sa akin." hinimas ko ang kanyang mukha at humiga ulit.

Dear Calculator,

Una sa lahat, gusto kong magpasalamat sayo sa pagtulong mo sakin sa bawat problema. Alam naman natin na ang problema ko lang lagi ay Math. Kaya naging close tayo diba? Lagi ako humihingi ng tulong sayo. Pero nang makilala ko si Elle, nagbago ang lahat. Nagkaproblema ako paano sya kakausapin, kung kasya ba ang baon ko pag ililibre ko sya, at kung may oras ako pag kailangan nya ako. At saka noong kashare ko sya sa pag gamit sayo kasi di nya dala calculator nya, yung sweetheart mo.

Natatandaan mo ba noon hindi ako mapakali para mahanap ang letrang U sayo. Bakit ba letra ang hanap ko eh diba calculator ka? Eng-eng ko no? Gusto ko lang naman sabihin sa kanya na 'Cu+e xA'. Ayun, dinaan ko nalang sa mga smiley, si ^-^ at si 8- ). Tuwang tuwa sya noon diba? Di na nga kami nakinig kay Prof. palitan nalang kami ng smiley na kayang gawin sayo. Hanggang gumawa ako ng paraan para masabi ko na cute sya gamit ka. Napagalitan kami nang napalakas ang tawa nya nang mabasa ang tinype ko, 'CY0+ M0'.

Sorry pala kapag nababagsak kita, ginugulat nya kasi ako eh. Ok ka pa naman diba? Napakamasayahin nya, ngiti lang nya eclipse ko na. Sana lagi nalang syang masaya at nakangiti, at baka makalimutan na kita pulutin pag nabagsak kita uli. Uy bestpren calculator, biro lang yun. Di kita kakalimutan.

Tandang tanda ko pa noong tinanong ko number nya, nakaready ang bolpen ko at papel na pinirat sa notebook ng katabi ko. Nagtaka pa ako, ikaw ang kinuha nya, sayo niya ipinagkatiwala ang number niya bestpren. Napa-YES nalang ako sa saya.

Kaya lang graduate na kami, maghihiwalay na ng landas. Di ko man sya matext gamit ang bespren kong calculator, matetext ko sya gamit ang aking cellular phone.

Huwag ka na magtampo bespren, engineering ang kukunin kong kurso. Bespren kita eh, ikaw ang makakasama ko habambuhay. Sayo nakasalalay ang kinabukasan ko. Huwag mo ako bibiguin ah? Bespren kita, alam mo lahat ng problema ko at lovelife ko. Salamat bespren, ikaw ang alaala ng sipag at tiyaga ko. Ikaw din ang magiging alaala ng pag-ibig ko. Bihira lang makahanap ng tunay na kaibigan na kagaya mo. Magsasama tayo habambuhay. Tandem tayo. Pakners!

Nagmamahal,

Engineer.

PS.

tulungan mo din ako sa Algebra!